|
E Bett uff de Strosse
Bei Millers tobt en Riesekrach,
Die gonz Nochberschaft horscht zu,
Des werd noch lauter, lässt nit noch,
Mer hert die rauh, dief Stimm vom Olde,
Die laut unn schrill von seiner Fraa,
Mer rennt zum Fenster, lurt im Nu.
Die Dier fliescht uff, de Miller kimmt,
Hot onschoints doch verlorn,
Weil soi groußi, stämmisch Old
Schmeißt em e Matratze noch,
Die fliescht em im die Ohrn.
Donn seschelt se die Trebbe nob,
Leiht midde uff de Stroß,
Unn vom Miller jetzt ko Spur mehr,
Der satzt fort, wie'n Hoos.
Äwwer wie sisch alles fiescht!
Die Matratze do im Freie
Hilft jetzt glei em onnern,
Der vom "Karbe", kroochevoll,
Mit miedem, schwerem, schwonkend Schritt
Die Stroße will hoomwonnern.
Er stolpert iwwer des waasch Ding,
Fällt hie unn leiht voll druff,
Bleibt leische, fängt es Schnorsche o
Unn gibt soin Wääsch sou uff.
Derweil soi gudi Fraa dehoom
Mescht sisch im ehn Gedonke,
Kennt se doch dorsch unn dorsch ihrn Monn
Unn waaß aa deshalb horgenau:
Der dud im "Karbe" tonke!
Sie seischt zum Sohn:
"Geih em entgäsche,
Du waaßt jo längst soin Wääsch,
Do dro dud sisch doch nie wos ännern,
Des bleibt sou, alli Dääsch."
De Bu geiht fort unn findt de Old
Uff de Matratze leische,
Gesischd unn Ärm soin scho rescht kolt,
Des is jo schließlisch aa ko Zimmer,
Do konn de Wind frei streische.
Er will de Vadder wecke,
Doch klappt's nit ims Verrecke!
Der wälzt sisch blouß unn schennt noch schwach:
"Hot mer donn nie soi Ruh!
Komm, leisch mer jetzt die Deck schee rim,
Unn donn, fort aus moim Zimmer,
Du frescher, beiser Bu!
Nit mol im eischne Haus dehoom
Gennt ooner mer en scheene Troom!"
Hans Meserle
beim 14. Mundartabend am 28.11.2003 in der Kochsmühle
|
