hvvlogosw

Heimat- und Verkehrsverein (HVV)
 63785 Obernburg am Main

Inhaltsverzeichnis

Startseite

Vereinsziele, Vorstand

Vereinsgeschichte

Obernburger Geschichte/n

Römische Geschichte/n

Bauwerke und Gebäude

Persönlichkeiten

Mundart

Aktivitäten

Tanz- und Kostümgruppe

Links

Impressum

Beitrittserklärung

banner_hvv

Äbbes

Wenn ihr misch froocht, wås e Omborscher Allerweltswort is,
dånn såch isch: äbbes! Des Wort konn mer fä alles brauche.
Wisst ihr üwwerhaupt, wås äbbes is?
Äbbes, des is hålt äbbes, un aus äbbes konn mä äbbes mache!

Wenn en junger Båsch heiern will, do muss er sisch äbbes suche,
e Mädsche, des äbbes hot, äbbes konn un äbbes mitbringt.
Un hot er sou äbbes gfunne, dånn hot er äbbes, äbbes fers Herz,
äbbes fers Gemiet un äbbes fers gånze Läwe.

Un dånn werd Hochzet gfeiert, die därf natürlisch äbbes koste,
des mer a glei sieht, dass a äbbes dehåhm is.
Denn ihr wisst, wou äbbes is, kimmt gewehnlisch immer noch äbbes dezu.
Dånn geiht mer uff die Hochzetsreis, do sieht mer äbbes, äläbt äbbes,
do konn mä sisch äbbes kaafe und äbbes mit håhmbringe.

Die Zeit geiht weider un uffemol erwart mer äbbes.
Die Nåchbern hewwes natürlisch scho lång gemerkt
un hewwe gsåcht, mir glawe, die kriesche äbbes.
Noja, un dånn hewwe se werklisch äbbes kriescht.

Wenn dånn des Kindsche im Bettsche kreischt,
dånn fehlt em äbbes.
Un wenns Hunger hot, dånn krieschts äbbes,
un wenns weider kreischt, dånn fehlt em äbbes ånnerschts.
Vielleischt hots äwwer a nur äbbes noigemåcht.

Speter kimmt de Bu in die Schul, do lernt er äbbes.
Un wenn en de Lehrer äbbes frocht un er äbbes ni waas,
dånn kriescht er äbbes uf die Finger odder sogår äbbes hinne druff,
obwohl mä sou äbbes heit ni mer därf.

Un wenn er aus de Schul kimmt, do lernt er äbbes,
dass er a äbbes werd un äbbes konn un äbbes vädient,
damit er, wenn er ålt werd, a äbbes zu beiße hot.

Wisst ihr jetzt, wås äbbes is?

Anna Hildebrandt

 

å = gesprochen wird dieses å wie das Wortende von Restaurant.